|
ប្រធានអគ្គិសនីកម្ពុជាខេត្តបាត់ដំបង បានអោយដឹងថាប្រជាពលរដ្ឋដែលរស់នៅតាមទីជនបទចម្ងាយ៤០គីឡូម៉ែត្រពីក្រុង នឹងទទួលបានចរន្តអគ្គិសនីប្រើប្រាស់នាពេលដ៏ខ្លីខាងមុខ ដែលជាតម្រូវការមួយយ៉ាងសំខាន់ដែលប្រជាពលរដ្ឋកំពុងចង់បាន។ ពីខេត្ដបាត់ដំបងលោក សុខ សាវីធ្វើសេចក្ដីរាយការណ៍ជូន។ លោក លឹម ប៊ុនថន ប្រធានអគ្គិសនីខេត្តបាត់ដំបងបានថ្លែងថា នៅឆ្នាំ២០១១ ប្រជាពលរដ្ឋខេត្តបាត់ដំបងដែលរស់នៅ៤០គីឡូម៉ែត្រពីទីក្រុង នឹងមានអគ្គិសនីប្រើប្រាស់គ្រប់គ្នា ដែលជាផ្នែកមួយយ៉ាងសំខាន់ក្នុងការបង្កើនជីវភាពរស់នៅរបស់ប្រជាពលរដ្ឋ។
លោក លឹម ប៊ុនថន បានមានប្រសាសន៍អោយដឹងថា ខេត្តបាត់ដំបង និងខេត្តមួយ ចំនួនបានទទួលគម្រោងបណ្តាញចែកចាយអគ្គិសនីជនបទ និងខ្សែបញ្ជូនក្នុងក្របខណ្ឌឥណទានពិភពលោក ដែលសម្ពោធនៅថ្ងៃ១៤ ខែកក្កដា២០០៨ ដែលក្នុងនោះ ខេត្តបាត់ដំបងទទួលបានគម្រោងប្រើប្រាស់ចរន្ត ២២គីឡូវ៉ុល។
លោកបានថ្លែងថា បច្ចុប្បន្ននេះ ចរន្តអគ្គិសនីបានពង្រីកការផ្គត់ផ្គង់ដល់ប្រជាពលរដ្ឋបាន ១០ទៅ ១៥ គីឡូម៉ែត្រពីទីក្រុងហើយ និងបន្តពង្រីកដល់៤០គីឡូម៉ែត្រពីទីក្រុងហើយតំបន់ខ្លះមានសេវាករបានទទួលវិនិយោគបន្តដើម្បីចែកចាយចរន្តដល់បងប្អូនប្រជាពលរដ្ឋតាមផ្លូវលំនានា។
ទោះបីយ៉ាងណា ប្រជាពលរដ្ឋដែលទទួលបានចរន្តអគ្គិសនីបានត្អូញត្អែរផងដែរក្នុងការតភ្ជាប់ចរន្តអគ្គិសនីប្រើប្រាស់ពីសេវាករ ដែលម៉ៅតពីរដ្ឋមានតម្លៃខុសគ្នាច្រើន កន្លែងខ្លះ តភ្ជាប់ចរន្តប្រើប្រាស់ត្រូវបង់២០ ទៅ៣០ម៉ឺនរៀល និងកន្លែងខ្លះសេវាករទាររហូតដល់ ១០០ ទៅ២០០ដុល្លារ ហើយតម្លៃកន្លែងខ្លះ១៣០០រៀលក្នុងមួយគីឡូវ៉ាត់ និងកន្លែងខ្លះគេទា១៦០០រៀល បើប្រៀបធៀបតម្លៃរដ្ឋតែ១០០០រៀលប៉ុណ្ណោះ។
ទោះបីយ៉ាងណាលោក លឹម ប៊ុនថន បានថ្លែងថា នេះជាការទទួលខុសត្រូវរបស់អគ្គិសនីកម្ពុជាជាមួយសេវាករ លោកមានប្រសាសន៍ថា នឹងយកបញ្ហាទាំងនេះទៅជម្រាបជូនដល់អគ្គិសនីកម្ពុជា ចំណែកលោកមិនមានតួនាទីដោះស្រាយបញ្ហាទាំងនេះឡើយ៕ |
