|
សាលាក្រុងភ្នំពេញ និងមន្ត្រីសាធារណការ និងដឹកជញ្ជូន រាជធានីភ្នំពេញបានចាប់ផ្តើមឈូសឆាយដីនៅលើសួនច្បារមួយ ស្ថិតនៅខាងលិចស្ពាននាគ ដើម្បីធ្វើកន្លែងបាតុកម្ម។ នេះគឺជាការធ្វើកន្លែងបាតុកម្ម ដើម្បីអនុវត្តតាមច្បាប់ស្តីពីការធើ្វបាតុកម្មនៃប្រទេសកម្ពុជា។ កញ្ញាទូចរង្សី រាយការណ៍ជូនលោកអ្នកស្តាប់។ ក្រុមមន្ត្រីអង្គការសង្គមស៊ីវិលបានអបអរសាទរចំពោះការរៀបចំធ្វើបាតុកម្ម ប៉ុន្តែថា កន្លែងសម្តែងមតិនេះគួរតែនៅក្បែរស្ថាប័នរដ្ឋសភា។ លោក រ៉ុងឈុន ប្រធានសមាគមគ្រូបង្រៀនកម្ពុជាឯករាជបានមានប្រសាសន៍ថា ទីកន្លែងបាតុកម្ម គួរតែធ្វើក្បែរកន្លែងក្រុមអ្នកតំណាងរាស្ត្រ។
ជាមួយគ្នានេះដែរលោក យ៉េង វីរៈ នាយកប្រតិបត្តិមជ្ឈមណ្ឌលអប់រំច្បាប់សម្រាប់សហគមន៍បានលើកអំពីទីតាំងសមប្រកបដែលគួរតែប្រជាជនធ្វើបាតុកម្ម។
ការលើកឡើងអំពីទីតាំងធ្វើបាតុកម្មនេះបានធ្វើឡើងបន្ទាប់ពីសាលាក្រុងភ្នំពេញបានចាប់ផ្តើមឈូសឆាយដីធ្វើទីលានបាតុកម្មដែលស្ថិតនៅលើសួនច្បារក្នុងសង្កាត់វត្តភ្នំខាងជើងស្ថានទូតអាម៉េរិក។ ទីលាននេះ មានប្រវែង៥៧ម៉ែត្រ និងទទឹង២១០ម៉ែត្រ រៀបការ៉ូ និងមានបង្គន់អានាម័យផង។
យោងតាមច្បាប់បាតុកម្មដែលទើបបានអនុម័តនាដើមឆ្នាំ២០១០ នេះ បានកំណត់ថារាល់ខេត្តក្រុងត្រូវមានទីលានបាតុកម្មមួយ។ លោក យ៉េង វីរៈ បានបញ្ចាក់ទៀតថា សម្រាប់ភ្នំពេញគួរតែមានកន្លែងបាតុកម្ម២កន្លែង ដែលមួយទៀតនោះ សម្រាប់បងប្អូនមកពីបណ្តាខេត្តមកធ្វើបាតុកម្ម។
មន្ត្រីសាលាក្រុងបានបញ្ចាក់ថា ទីលានបាតុកម្មនេះនឹងសាងសង់រួចរាល់ក្នុងរយៈពេល៣ខែខាងមុខនេះ៕ |
