|
អ្នក ភូមិជនជាតិដើមព្នងនៅឃុំប៊ូស្រា ស្រុកពេជ្រាដា ខេត្តមណ្ឌលគិរី ចំនួន ៥៨នាក់ នៅព្រឹកថ្ងៃ២០ កក្កដានេះ បាននាំគ្នាធ្វើពិធីបួងសួងមួយតាមជំនឿសុំឲ្យអារក្សអ្នកតាព្រៃ ភ្នំ ជួយអ្នកភូមិក្នុងការទាមទារដីធ្លីចំនួន ៣៥០ហិកតារដែលក្រុមហ៊ុនសម្បទានសេដ្ឋកិច្ចមួយកំពុងគ្រប់គ្រង មកឲ្យអ្នកភូមិវិញដើម្បីប្រកបរបរកសិកម្មចិញ្ចឹមជីវិត។ពិធីនេះធ្វើឡើងនៅតំបន់ស្រែចម្ការពិតរបស់អ្នកភូមិនៅចំណុច អូរលែងពូលឺវ អូររកាវ ផ្លូវដុតសំរាម ក្នុងភូមិសាស្ត្រឃុំប៊ូស្រា ដោយមានការកាប់ជ្រូក សែនស្រាពាង ឧទ្ទិសដល់វត្ថុស័ក្ដិសិទ្ធិព្រៃភ្នំ ឲ្យជួយផ្ដល់យុត្តិធម៌ដល់អ្នកភូមិ និងផ្ដន្ទាជនទាំងឡាយណាដែលរំលោភបំពានសិទ្ធិរស់រានមានជីវិតនៃ ក្រុមជនជាតិដើមភាគតិច។ តំណាងអ្នកភូមិឈ្មោះ កប់ នេត្រ មានប្រសាសន៍ថា អ្នកភូមិបានបញ្ឈប់ការតវ៉ាដោយហិង្សា ហើយធ្វើការទាមទារតាមរយៈការតស៊ូមតិជាមួយក្រុមហ៊ុន និងអាជ្ញាធរពាក់ព័ន្ធ តែមិនមានដំណោះស្រាយណាមួយទទួលបានលទ្ធផលដល់ពួកគាត់ ក្នុងការទាមទារដីមកវិញបាននោះទេ ដូច្នេះជម្រើសរបស់អ្នកភូមិ គឺពឹងផ្អែកលើបារមីវត្ថុស័ក្ដិសិទ្ធិវិញ។
តំណាងអ្នកភូមិដដែលបានបញ្ជាក់ថា ៖ «គេជឿ គេធ្វើណាស់ ដែលគេជឿជាក់ ១រយ ១ពាន់ណា៎!អ៊ីចឹងបើសិនជា មិនថារាជរដ្ឋាភិបាលក៏ដោយ មិនថាចំពោះក្រុមហ៊ុនក៏ដោយ បើគាត់អត់មានយល់ និងអាណិតមេត្តាដល់ប្រជាពលរដ្ឋហ្នឹង គាត់យកទោសយកពៃរ៍ អាហ្នឹងក៏ស្រេចលើគាត់យល់ចុះ!»។
មេឃុំប៊ូស្រា លោក កេង ញ៉ក់ មានប្រសាសន៍ថា លោកបានចាត់មន្ត្រីភូមិឲ្យទៅសង្កេតការណ៍មើលពិធីជាជំនឿរបស់អ្នក ភូមិដែលមិនមានអ្វីត្រូវរារាំង ឬហាមឃាត់នោះទេ ក៏ប៉ុន្តែអ្វីដែលអ្នកភូមិចោទថា ក្រុមអាជ្ញាធរមិនបានយកចិត្តទុកដាក់ជួយអ្នកភូមិ គឺជាការមិនពិត។
លោក កេង ញ៉ក់ បានអះអាងថា ៖ «ថាមួយចំនួនតូចមិនចូលរួម ហើយមិនសុខចិត្តអ៊ីចឹងណា៎! ក្រុមហ៊ុនគេដោះស្រាយគោលនយោបាយ សួរគាត់ផ្ទាល់ៗអ៊ីចឹងណា៎!»។
អ្នកភូមិប៊ូស្រា កាលពីដើមឆ្នាំ២០០៩ បានប្រើអំពើហិង្សាលើកគ្នាទៅបណ្ដេញក្រុមហ៊ុនសម្បទាន ដែលបានចូលមកឈូសឆាយប៉ះពាល់ទៅដីធ្លីស្រែចម្ការ តំបន់ព្រៃគោរពបូជា តំបន់កប់សព ដីចម្ការវិលជុំ និងតំបន់ព្រៃឈើដែលអ្នកភូមិអភិរក្ស។ បន្ទាប់ពីហេតុការណ៍នោះ ក្រុមអាជ្ញាធរពាក់ព័ន្ធ តំណាងក្រុមហ៊ុន និងសង្គមស៊ីវិល បានចូលរួមស្វែងរកដំណោះស្រាយសន្តិវិធី ដើម្បីបញ្ចប់បញ្ហា ក៏ប៉ុន្តែរហូតបច្ចុប្បន្ននេះទំនាស់នៅតែបន្តកើតមាន។
អ្នកសម្របសម្រួលកម្មវិធីដីធ្លីនៃមជ្ឈមណ្ឌលអប់រំច្បាប់សម្រាប់ សហគមន៍ លោក ម៉ម វុទ្ធី មានប្រសាសន៍ថា អ្នកភូមិជនជាតិដើមមានប្រពៃណីរស់អាស្រ័យដីធ្លី និងធនធានធម្មជាតិ។ ដំណោះស្រាយឲ្យអ្នកភូមិលក់ដីយកប្រាក់ មិនអាចធ្វើឲ្យមានដំណោះស្រាយល្អប្រសើរ ដើម្បីបញ្ចប់ទំនាស់ខាងលើបានទេ។
លោក ម៉ម វុទ្ធី បានឲ្យដឹងថា ៖ «មានតែការជំរុញឲ្យប្រជាពលរដ្ឋ ហ្នឹងលក់ដីឲ្យក្រុមហ៊ុន និងដោះស្រាយឲ្យលុយគោលនយោបាយ តែរក្សាទុកដីឲ្យគាត់ប្រកបរបរចិញ្ចឹមជីវិត តាមបែបប្រពៃណីរបស់គាត់ហ្នឹង វាអត់ទាន់មាន! អ៊ីចឹងគាត់ចេះតែតាមទាមទារ!»។
តំណាងអ្នកភូមិប៊ូស្រាឲ្យដឹងថា កាលពីខែឧសភា ឆ្នាំ២០១០ នៅក្នុងវេទិកាជំនួបរវាងក្រុមហ៊ុន សុកហ្វីន ខេស៊ីឌី ជាមួយអ្នកភូមិជាង ៣០០នាក់ នៅឯកសិដ្ឋានក្រុមហ៊ុន ភាគីក្រុមហ៊ុនស្នើអនុវត្តជំហានទី២ គឺបន្តការឈូសឆាយដី ក៏ប៉ុន្តែអ្នកភូមិមិនយល់ព្រម ហើយទាមទារឲ្យដោះស្រាយបញ្ចប់បញ្ហាប្រគល់ដី ៣៥០ហិកតារមកអ្នកភូមិរួចរាល់សិន៕ |
