|
ក្រុម អាជីវករផ្សារទួលគោករាប់សិបនាក់ នៅព្រឹកថ្ងៃ២៤ កក្កដានេះ បានមកជួបជុំគ្នានៅមុខផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីស្នើឲ្យប្រមុខដឹកនាំជួយចាត់វិធានការបញ្ចប់ជម្លោះ ដែលបានអូសបន្លាយ ៣ឆ្នាំកន្លងមក រវាងអាជីវករ និងម្ចាស់ក្រុមហ៊ុនវិនិយោគផ្សារ។ ស្ត្រីឈ្មោះ ហេង ច័ន្ទស្រី ដែលអះអាងថា ជាតំណាងឲ្យអាជីវករផ្សារទួលគោក មានប្រសាសន៍ថា វិវាទរវាងក្រុមហ៊ុនវិនិយោគផ្សារឈ្មោះ KING FORTUNE INDUSTRY ជាមួយអាជីវករបានកើតមាន ៣ឆ្នាំមកហើយ ប៉ុន្តែរហូតមកដល់ពេលនេះ ពុំទាន់មានដំណោះស្រាយពីអាជ្ញាធរអាចឲ្យអាជីវករទទួលយកបាននៅឡើយ។
តំណាងរូបនេះឲ្យដឹងថា ជម្លោះឈានដល់ការឡើងមកសុំកិច្ចអន្តរាគមន៍ដល់មុខផ្ទះលោកនាយក រដ្ឋមន្ត្រី កើតឡើងដោយសារម្ចាស់ក្រុមហ៊ុនវិនិយោគផ្សារទួលគោក មិនបន្តកុងត្រា និងបានដំឡើងតម្លៃតូបខ្ពស់ ដោយមិនសួរយោបល់ពីក្រុមអាជីវករជាមុន។
អ្នកស្រី ច័ន្ទស្រី បានសំណូមពរទៅលោកនាយករដ្ឋមន្ត្រី ហ៊ុន សែន ដូច្នេះ ៖ «ខ្ញុំ ជាតំណាងអាជីវករ បោះឆ្នោតឲ្យដូចតែប្រជាជនគ្រប់គ្នាបោះឆ្នោតឲ្យសម្ដេចដែរ ខ្ញុំរងគ្រោះដូចសម្ដេចអ៊ីចឹង បានត្រឹមតែគេស្អប់ទេ ចុងបំផុតខ្ញុំជាមុខសញ្ញារបស់ក្រុមហ៊ុនចោទប្រកាន់ខ្ញុំ ប្ដឹងខ្ញុំទៅតុលាការ ខ្ញុំធ្វើអីខុស? ខ្ញុំជាតំណាងអាជីវករ សាលាក្រុងក៏ហៅខ្ញុំទៅ សាលាខណ្ឌក៏ហៅខ្ញុំទៅ»។
ចំណែកក្រុមអាជីវករផ្សេងទៀត ក៏បានស្នើឲ្យលោក ហ៊ុន សែន ជួយរកដំណោះស្រាយបញ្ចប់ជម្លោះឲ្យបានឆាប់ ព្រោះបច្ចុប្បន្នម្ចាស់ក្រុមហ៊ុនវិនិយោគ បានគំរាមប្ដឹងអាជីវករទៅតុលាការ និងមានគម្រោងបណ្ដេញក្រុមអាជីវករឲ្យចេញពីស្តង់នៅថ្ងៃទី៣០ ខែកក្កដា ខាងមុខ។
ក្រុមអាជីវករមានសំណូមពរដូច្នេះ ៖ «ទាមទារសុំឲ្យមានកុងត្រាវែង សុំឲ្យតម្លៃនៅដដែល ហើយសុំឲ្យក្រុមហ៊ុនហ្នឹងធ្វើអីទៅហៅអាជីវករទៅប្រជុំផង...»។
វិទ្យុអាស៊ីសេរីមិនទាន់អាចទំនាក់ទំនងតំណាងក្រុមហ៊ុនវិនិយោគ ផ្សារទួលគោក ដើម្បីបំភ្លឺជុំវិញការឡើងមកតវ៉ារបស់ក្រុមអាជីវករបានទេតាម ទូរស័ព្ទ នៅថ្ងៃទី២៤ ខែកក្កដានេះ។
ប្រធានគណៈកម្មការផ្សារទួលគោក លោក សៅ លីវ៉ន បានអំពាវនាវដល់អាជ្ញាធរខណ្ឌ ឬអាជ្ញាធរក្រុង ជាពិសេសប្រមុខដឹកនាំសូមជួយរកដំណោះស្រាយបញ្ចប់ជម្លោះរវាង ក្រុមហ៊ុនវិនិយោគផ្សារ និងអាជីវករឲ្យបានឆាប់។
លោក លីវ៉ន ឲ្យដឹងពីដើមហេតុនាំឲ្យកើតមានជម្លោះដូច្នេះ ៖ «ទី ១ ខ្ញុំចង់បានកុងត្រា ហើយតម្លៃតូបនៅដដែល។ គាត់តវ៉ាមួយទៀត គឺក្រុមហ៊ុនចង់ដកតំណាងអាជីវករ ៦នាក់ចេញ បិទតូបនៅថ្ងៃ៣០ (កក្កដា)ហ្នឹង...»។
ទោះយ៉ាងណាក៏ដោយ មិនមានកិច្ចអន្តរាគមន៍ភ្លាមៗពីលោកនាយករដ្ឋមន្ត្រី ហ៊ុន សែន នោះទេ។ ប៉ុន្តែមន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន នៅថ្ងៃទី២៤ ខែកក្កដានេះ បានសន្យាថា នឹងបញ្ជូនកង្វល់របស់អាជីវករដាក់ជូនទៅលោកនាយករដ្ឋមន្ត្រីឲ្យបាន ដឹង នឹងអន្តរាគមន៍នៅថ្ងៃច័ន្ទ ទី២៦ ខែកក្កដា សប្តាហ៍ខាងមុខ៕ |
