|
អត្ថបទដោយ ស៊ឺន សុន កិច្ចប្រជុំរវាងប្រទេសដៃគូអ្នកវាយតម្លៃអចលនទ្រព្យអាស៊ានបានបើកកិច្ចប្រជុំលើក ទី១៦ នៅទីក្រុងបាងកកប្រទេសថៃ កាលពីថ្ងៃទី២១ ខែកក្កដា កន្លងមក។ វេទិការរយៈពេល៤ថ្ងៃនេះ ជាការប្រជុំ ពីដំណើរការវាយ តម្លៃ និងសក្ដានុពលនៃវិស័យអចលនទ្រព្យក្នុងតំបន់ ការធ្វើសហប្រតិបត្ដិការ ការពង្រឹងស្ដង់ដា និងគុណភាពសម្រាប់ប្រទេសសមាជិក អាស៊ានទាំងអស់។ មិនតែប៉ុណ្ណោះកិច្ចប្រជុំនេះបានផ្ដោតការយកចិត្ដទុកដាក់ទៅលើការពង្រឹងសមត្ថភាពអ្នកវាយតម្លៃអចលនទ្រព្យ ប្រកបដោយប្រសិទ្ធិភាព រវាងអ្នកវាយតម្លៃអចលនទ្រព្យជាតិ និងអន្ដរជាតិ។ វេទិការដ៏មានតម្លៃមួយនេះ មានការអញ្ជើញចូលរួមពីថ្នាក់ដឹកនាំគណប្រតិភូកម្ពុជា លោក នង ពិសិដ្ឋ តំណាងមកពីក្រសួង សេដ្ឋកិច្ចនិងហិរញ្ញវត្ថុ និងលោក ស៊ឹង ប៊ុណ្ណា ប្រធានសមាគមអ្នកវាយតម្លៃអចលនទ្រព្យជាតិកម្ពុជា និងជានាយកក្រុមហ៊ុនប៊ុណ្ណារៀលធីគ្រុប និងមន្ដ្រីជំនាញផ្នែកអចលទ្រព្យកម្ពុជាច្រើនរូបទៀត។
ក្នុងឱកាសនោះលោកប្រធាន ស៊ឹង ប៊ុណ្ណា បាននិយាយថា កិច្ចប្រជុំដែលធ្វើឡើងនៅប្រទេសថៃគឺមានតម្លៃខ្លាំងណាស់សម្រាប់ប្រទេសកម្ពុជា អាចមានឱកាសបានធ្វើការផ្លាស់ប្ដូរបទពិសោធន៍ជាមួយបរទេស និងទទួលបានចំណេះដឹងថ្មីពីរបៀបនៃការវាយតម្លៃ អចលនទ្រព្យប្រកបដោយស្ដង់ដាអន្ដរជាតិ។ ចំណេះដឹងទាំងនេះនឹងអាចធ្វើឱ្យកម្ពុជាមានអ្នកជំនាញខាងផ្នែកអលនទ្រព្យកើនឡើង ហើយអាចធ្វើការ ប្រកួតប្រជែងជាមួយបណ្ដាប្រទេសផ្សេងៗទៀតក្នុងសមាជិកអាស៊ាន។
លោកប្រធានរូបនេះនិយាយថា មិនយូរជាង៣ឆ្នាំទៀតទេអ្នកវាតម្លៃអចលនទ្រព្យកម្ពុជាអាចទៅធ្វើការវាយតម្លៃអចលនទ្រព្យ ប្រទេសផ្សេងទៀតបាន ដូចដែលអ្នកវាយតម្លៃអចលនទ្រព្យបរទេសអាចមកធ្វើការវាយតម្លៃនៅប្រទេសយើងបាន។ ពោលគឺការវាយតម្លៃមួយដែលមានគុណភាពបំផុតស្រប តាមស្ដង់ដាអន្ដរជាតិ។
វេទិការសមាគមអ្នកវាយតម្លៃអចលនទ្រព្យអាស៊ាន ដែលជាកិច្ចប្រជុំរវាងសមាជិកថ្នាក់ដឹងនាំ អាស៊ានធ្វើឡើងរៀងរាល់ឆ្នាំទៅតាមលំដាប់នៃកិច្ចប្រជុំក្នុងការអនុម័តទៅឱ្យប្រទេសណាមួយ។ សូមបញ្ជាក់ថា កម្ពុជាទើបតែចូលជាសមាជិក អ្នកវាយ តម្លៃអចលនទ្រព្យអាស៊ានបានចំនួនពីរឆ្នាំប៉ុណ្ណោះ។
ជាមួយនឹងការលើកឡើងនេះគណប្រតិភូ លោក នង ពិសិដ្ឋ ប្រធានតំណាងមកពីក្រសួងសេដ្ឋកិច្ចបាននិយាយថា សារៈសំខាន់នៃ ការវាយតម្លៃនេះគឺធ្វើឡើងដើម្បីការពារការចុះបញ្ជីអចលនទ្រព្យស្របច្បាប់នៅកម្ពុជា។ លោកបន្ដថា កម្ពុជានូវមិនទាន់មានការវាយតម្លៃ អចលនទ្រព្យប្រកបដោយស្ដង់ដាពិតប្រាកដនៅឡើយទេពេលនេះ ប៉ុន្ដែកម្ពុជាត្រៀមខ្លួនរៀបចំធ្វើឱ្យមានស្ដង់ដានៅពេលដ៏ខ្លីខាងមុខ។ ហើយពេលនោះអ្នកវាយតម្លៃអចលនទ្រព្យកម្ពុជាក៏អាចធ្វើការវាយតម្លៃអចលនទ្រព្យក្នុងប្រទេសសមាជិកអាស៊ានដទៃទៀតបាន ព្រោះប្រទេសអាស៊ានបានឱ្យតម្លៃ និងទទួលស្គាល់កម្ពុជាពេញច្បាប់។
ចំពោះមុខបណ្ដាសមាជិកសមាគមន៍អ្នកវាយតម្លៃអចលនទ្រព្យអាស៊ាន លោកប្រធាន ស៊ឹង ប៊ុណ្ណា បានលើកឡើងពីការលំបាកនៃ អ្នកវាយតម្លៃអចលនទ្រព្យ និងកង្វះខាតធនធានមនុស្សនៅកម្ពុជា។ សំណើរនេះធ្វើឱ្យសមាជិអាស៊ានទាំងអស់មានការគាំទ្រលោកយ៉ាង ខ្លាំង។ ហើយប្រទេសដែលថា ជួយដល់កម្ពុជាដំបូងបំផុតគឺប្រទេសម៉ាឡេស៊ី និងប្រទេសសាំងហ្គាពួរសម្រេចជួយកម្ពុជាក្នុងការបណ្ដុះ បណ្ដាលជំនាញផ្នែកវាយតម្លៃអចលនទ្រព្យសម្រាប់កម្ពុជានាពេលឆាប់ៗខាងមុខ។
ជាងនេះទៀតលោក ប្រធានសមាគមរូបនេះនិយាយថា ផ្លែផ្កាដ៏ធំធេងបំផុតមួយទៀតនោះគឺសមាជិកអាស៊ានទាំងអស់បាន ឯកភាពបោះឆ្នោតឱ្យកម្ពុជាធ្វើជាម្ចាស់ផ្ទះក្នុងការទទួលពួកគេសម្រាប់ឆ្នាំ២០១១ខាងមុខនេះ។ ទន្ទឹមគ្នាដែលកម្ពុជាធ្វើជាម្ចាស់ផ្ទះវិញនោះ លោកប្រធាន ស៊ឹង ប៊ុណ្ណា ក៏សូមអំពាវនាវដល់រដ្ឋាភិបាលកម្ពុជា និងវិនិយោគគិននានាក្នុង និងក្រៅប្រទេសមេត្ដាជួយគាំទ្រក្នុងការទទួលសមាជិក សមាគមអ្នកវាយតម្លៃអចលនទ្រព្យអាស៊ានឆ្នាំ២០១១។
ពាក់ព័ន្ធនឹងគុណភាពនៃការវាយតម្លៃអចលនទ្រព្យ លោក ប្រធាន ស៊ឹង ប៊ុណ្ណា អំពាវនាវម្ដងហើយម្ដងទៀតដល់ក្រុមមន្ដ្រីជំនាញ ផ្នែកវាយតម្លៃអចលនទ្រព្យ និងសេវាកម្មអចលនទ្រព្យទាំងអស់មេត្ដាយកចិត្ដទុកដាក់ក្នុងការពង្រឹងសមត្ថភាព គុណភាព និងព្យាយាម ស្វែងរកចំណេះបន្ថែមដើម្បីឱ្យការវាយតម្លៃអចលនទ្រព្យរបស់ខ្លួនឈានចូលទៅរកស្ដង់ដាអន្ដរជាតិនិងអាចប្រកួតប្រជែងជាមួយសមាជិក អាស៊ានទាំងនោះបាន។ |
