|
តួលេខថ្មី របស់អង្គការសហប្រជាជាតិស្ដីពីពាណិជ្ជកម្ម បង្ហាញឲ្យដឹងថា ការនាំចូលស៊ីម៉ង់ត៍ដែលមានផ្ទុកសារធាតុ អាបេស្តុស ដើម្បីយកទៅប្រើប្រាស់ ក្នុងឧស្សាហកម្មសំណង់ នៅប្រទេសកម្ពុជា បានកើនឡើងសឹងតែត្រីភាគ ចាប់ពី ឆ្នាំ ២០០៨ ដល់ឆ្នាំ ២០០៩។ ពិភពលោកបានដាក់បម្រាមហាមការប្រើប្រាស់សារធាតុអាបេស្តុស ដោយសារគេ ដឹងថាសារធាតុនេះ នាំឲ្យកើតមហារីក។ សារព័ត៌មានភ្នំពេញប៉ុស្តិ៍ និយាយថា តួលេខទាំងនេះបង្ហាញឲ្យដឹងថា គ្រឿងសំណង់ភាគច្រើន នាំចេញពីប្រទេសម៉ាឡេស៊ី និងប្រទេសថៃ ចូលមកប្រទេសកម្ពុជា។
សារព័ត៌មាននេះបានដកស្រង់សម្ដីរបស់លោកស្រី Laurie Kazan-Allen អ្នកសម្របសម្រួលឲ្យលេខាធិការដ្ឋានអន្តរជាតិផ្នែកបម្រាមអាបេស្តុស ដែលនិយាយថា ប្រទេសកម្ពុជាប្រើអាបេស្តុសជាច្រើន ហើយថាតួលេខនៃការប្រើអាបេស្តុសនេះក៏កើនឡើងកាន់តែខ្ពស់ទៅដែរ។
លោកស្រីនិយាយថា នេះគឺជាព័ត៌មានអកុសល ហើយជារឿងមិនល្អទាល់តែសោះចំពោះប្រទេសកម្ពុជា ក្នុងការប្រើអាបេស្តុស ក្នុងទ្រង់ទ្រាយធំបែបនេះ នៅពេលដែលពិភពលោកបានដឹងនិងឮអំពីគ្រោះថ្នាក់ ពាក់ព័ន្ធនឹងសារធាតុអាបេស្តុសនេះ។
ប្រធានទិញសម្ភារៈសំណង់ឲ្យក្រុមហ៊ុន Chip Mong Group ដែលជាក្រុមហ៊ុនផ្គត់ផ្គង់គ្រឿងសម្ភារៈសំណង់ក្នុងស្រុក និយាយថា ក្រុមហ៊ុនរបស់លោកបាននាំចូលស៊ីម៉ង់ត៍មានសារធាតុអេបេស្តុសចំនួនពី ៣ម៉ឺទៅ៥ម៉ឺនតោន ជារៀងរាល់ខែ ពីក្រុមហ៊ុន Siam City Cementដែលជាក្រុមហ៊ុនថៃ៕ |
